Sorumutu foka iha fortalesimentu diplomasia, dezenvolvimentu infraestrutura, edukasaun, no kapasitasaun rekursu umanu.
DÍLI, 08 Setembru 2026 — Parlamentu Nasionál Timor-Leste simu vizita ofisiál husi Delegasaun Parlamentár Japaun nian ne’ebé ho lideransa husi Xefe Delegasaun, Mr. Endo Takashi, hamutuk ho nia komitiva iha uma fukun Parlamentu Nasionál, ho objetivu atu hametin liutan relasaun amizade no kooperasaun entre nasaun rua ne’e.
Iha enkontru biban ne’e, Prezidente Parlamentu Nasionál Timor-Leste, Maria Fernanda Lay, hamutuk ho Distintu Deputadu Manuel H. Noronha, nudar Prezidente em Ejersísiu no Vise-Prezidente Grupu Amizade Parlamentár Timor-Leste ba Japaun, simu ho haksolok delegasaun altu novél husi Japaun ne’e. Vizita historicá ne’e hatudu kompromisu boot husi parte rua nian atu kontinua haburas di’ak liutan relasaun diplomátika ne’ebé mehi husi tempu naruk.
Iha sorumutu ne’e, parte rua husi parlamentu rua nian diskute kona-ba oinsá hametin liutan kooperasaun parlamentár, hatutan parseria stratéjika, no haforsa liutan diplomasia entre Timor-Leste ho Japaun. Tópiku sira ne’ebé sai diskusaun prinsipal mak inklui dezenvolvimentu infraestrutura, edukasaun, ho mós kapasitasaun ba rekursu umanu sira ne’ebé sai nu’udar pilar fundamentál ba progressu nasaun nian.
Prezidente em Ejersísiu Grupu Amizade Parlamentár, Manuel H. Noronha, hatuten katak vizita ne’e iha signifikadu boot tebes ba futuru relasaun bilaterál. Nia subliña katak Japaun kontinua sai hanesan parseiru dezenvolvimentu ne’ebé importansia ho servisu hamutuk ho Timor-Leste iha setór oi-oin. Mós hato’o agradesimentu wain ba apoiu sustentável husi Governu no Povu Japaun nian abitan sira husi tempu ba tempu.
Iha parte seluk, Xefe Delegasaun Japaun, Mr. Endo Takashi, mós espresa nia haksolok ba simu matak ho oin-haksolok ne’ebé hato’o husi parlamentár Timor-Leste nian. Nia reitera kompromisu Parlamentu Japaun nian atu kontinua apoia Timor-Leste iha dezenvolvimentu ekonómiku no demokrásia, no hein katak enkontru ne’e sei loke dalan foun ba troka mehi no parseiru stratejiku sira seluk iha futuru. Sorumutu ne’e remata ho troka lembransa no foto konjunta. (Crs)
