Lista Konteúdu
Suaraleste LAUTÉM, 22 Outubru 2026 — Primeiru-Ministru (PM), Kay Rala Xanana Gusmão, hato’o boas-vindas ba partisipante sira Festivál Fronteira 2026, ne’ebé hala’o iha Suku Com, Munisípiu Lautém, ho objetivu atu hametin amizade, interkambiu kulturál no rekonsiliasaun entre komunidade sira iha área fronteira Timor-Leste no Indonézia.
PM Xanana Gusmão hato’o mensajen ne’e durante serimónia abertura festivál nian, Kinta-feira (22/10) kalan, no subliña katak eventu ne’e sai oportunidade importante ba komunidade hosi nasaun rua atu fahe esperiénsia, kultura no valor amizade, hodi hametin relasaun no komprensaun mútu.
Primeiru Ministro (PM) Gayrala Xanana Gusmão Hato’o Bem-vindo ba Partisipante Festivál 2026
“Bem-vindu mai iha festivál ida-ne’e. Ha’u hein katak, durante loron tolu iha ne’e, ita bele fahe esperiénsia ba malu kona-ba ita-nia kultura no amizade, liuliu atu hametin liután relasaun rekonsiliasaun entre kultura ho kultura. Ha’u kontente tebes haree imi hotu iha ne’e no haree ema barak mai partisipa,” PM Xanana Gusmão dehan.
Festivál Fronteira 2026 hala’o ho tema “Interkambiu Kulturál ba Hametin Rekonsiliasaun” no subtema “Ha’u Nia Rai – Ha’u Nia Tasi – Ha’u Nia Kultura”, ne’ebé foka ba promosaun identidade kulturál, hametin amizade entre komunidade fronteira no kria oportunidade ba dezenvolvimentu lokál.
Benefísiu hosi Festivál Fronteira 2026
Festivál Fronteira 2026 fó benefísiu importante ba komunidade sira iha Timor-Leste no Indonézia, liuliu iha área fronteira, tanba kria oportunidade atu promove no valoriza diversidade kulturál, tradisaun no patrimóniu lokál. Liuhosi atividade kulturál ne’ebé hala’o hamutuk, komunidade sira bele fahe sira-nia identidade kulturál, aumenta koñesimentu malu no hametin relasaun amizade entre povu rua.
Aleinde ne’e, festivál ne’e kontribui atu promove respeitu ba diferensa, komprensaun mútu no kooperasaun transfronteirisa, nune’e bele hametin dame, solidariedade no koezáun sosial entre komunidade sira. Partisipasaun iha atividade hanesan ne’e mós bele kria oportunidade ba juventude atu aprende no preserva kultura no tradisaun hosi sira-nia inan-aman no bei-ala, atu patrimóniu kulturál bele kontinua moris no pasa ba jerasaun tuirmai.
Programa festivál nian inklui aprezentasaun arte no dansa tradisionál, expozisaun produtu lokál no atividade sira ne’ebé relasiona ho ekonomia azúl, peska sustentável, ekoturizmu no konservasaun rekursu tasi nian. Atividade sira-ne’e mós iha potensiál atu promove produtu no servisu lokál, nune’e komunidade bele aproveita eventu kulturál hanesan oportunidade atu dinamiza atividade ekonómika.
Partisipante sira mai hosi komunidade no delegasaun oioin iha Timor-Leste no Indonézia. Delegasaun hosi Indonézia inklui reprezentante sira hosi Provínsia Nusa Tenggara Timur (NTT), hanesan Kabupaten Belu, Kabupaten Timor Tengah Utara (TTU) no Kabupaten Kupang. Partisipasaun hosi delegasaun hirak-ne’e reforsa dimensaun transfronteirisa festivál nian, liuliu iha esforsu atu hametin ligasaun entre komunidade sira iha nasaun rua.
Entre grupu kultura ne’ebé partisipa mak Sanggar Sandalwood, ne’ebé reprezenta kultura hosi TTU. Delegasaun sira seluk mós inklui reprezentante hosi Maluku no Kalimantan, Indonézia, no komunidade hosi illa Kisar no Wetar. Partisipasaun hosi grupu sira-ne’e hatudu diversidade kulturál ne’ebé bele sai ponte atu hametin relasaun amizade no kooperasaun entre komunidade sira.
Organizasaun Festivál Fronteira 2026 envolve Centro Nacional Chega! (CNC), Sekretaria Estadu Arte no Kultura (SEAK), Ministériu Administrasaun Estatál (MAE), Gabinete Fronteira Terrestre no Marítima no Autoridade Munisipál Lautém. Kooperasaun entre instituisaun hirak-ne’e importante atu apoia realizasaun atividade kulturál no promove partisipasaun komunidade nian.
Objektivu
Atu hato’o informasaun kona-ba partisipasaun Primeiru-Ministru Kay Rala Xanana Gusmão iha abertura Festivál Fronteira 2026 iha Suku Com, Munisípiu Lautém, no promove interkambiu kulturál, hametin amizade, rekonsiliasaun no kooperasaun transfronteirisa entre komunidade Timor-Leste no Indonézia, hodi apoia preservasaun kultura no dezenvolvimentu lokál.
Festivál ne’e hala’o hosi 23 to’o 25 Outubru 2026, iha Suku Com, Postu Administrativu Lautém, Munisípiu Lautém. Durante loron tolu ne’e, atividade sira ne’ebé aprezenta sei sai espasu ba komunidade no partisipante sira atu hasoru malu, fahe esperiénsia no hametin relasaun kulturál.
Liuhosi interkambiu kulturál no partisipasaun ativa hosi komunidade sira, Festivál Fronteira 2026 iha esperansa atu kontribui ba hametin dame, komprensaun mútu no kooperasaun transfronteirisa entre Timor-Leste no Indonézia, no mós promove kultura nu’udar elementu importante ida ba unidade, amizade no dezenvolvimentu sustentável iha área fronteira. (crs)
